Al-Maʻārij The Ascending Stairways
Allah ke naam se jo Rehman o Raheem hai.
1: Mangne waley ne azaab maanga hai (woh azaab) jo zaroor waqey honay wala hai
2: Kafiron ke liye hai, koi usey dafa karne wala nahin.
3: Us khuda ki taraf se hai jo urooj ke zeeno (ascending steps)ka malik hai.
4: Malaika (angels) aur rooh(Jibrael) uske huzoor chadh kar jatey hain ek aise din mein jiski miqdar pacchas (fifty) hazar saal hai
5: Pas aey Nabi, sabr karo, shaista sabr
6: Yeh log usey dur samajhte hain
7: Aur hum usey qareeb dekh rahey hain.
8: (woh azaab us roz hoga) jis roz aasman pigli huye chandi ki tarah ho jayega
9: Aur pahad rang-bi-rang ke dhunke huey oon (wool) jaise ho jayenge
10: Aur koi jigri dost apne jigri dost ko na puchega
11: Halaanke woh ek dusre ko dikhaye jayenge, mujrim chahega ke us din ke azaab se bachne ke liye apni aulad ko
12: Apni biwi ko, apne bhai ko
13: Apne qareeb-tareen khandaan ko jo usey panaah dene wala tha
14: Aur rooh-e-zameen ke sab logon ko fidiya (badle) mein dey-de aur yeh tadbeer usey nijaat dila de.
15: Hargiz nahin woh to bhadakti hui aag ki lapat hogi
16: Jo gosht posht ko chaat jayegi
17: Pukar pukar kar apni taraf bulayegi har us shaks ko jisne haqq se mooh moda aur peet pheri
18: Aur maal jamaa kiya aur seint seint kar (amassed wealth) rakkha
19: Insan thud-dila (impatient) paida kiya gaya hai
20: Jab uspar museebat aati hai to ghabra uthta hai
21: Aur jab usey khush-haali naseeb hoti hai to bukhl (kanjoosi) karne lagta hai
22: Magar woh log (is aib se bache huey hai) jo namaz padne waley hain
23: Jo apni namaz ki hamesha pabandi karte hai
24: Jinke maalon mein
25: Saahil (maangne waley) aur mehroom ka ek haqq mukarrar hai.
26: Jo roz-e-jaza ko barhaq maante hain
27: Jo apne Rubb ke azaab se darte hain
28: Kyunke unke Rubb ka azaab aisi cheez nahin hai jissey koi bekhauf ho
29: Jo apni sharmgahon ki hifazat karte hain
30: Ba-juz apne biwiyon ya apni mamluka aurton ke jinse mehfooz na rakhne mein unpar koi malamat nahin
31: Albatta jo iske alawa kuch aur chahein wahi hadd se tajawuz karne wala hai.
32: Jo apne amanaton ki hifazat aur apne ahad (covenant) ka paas karte hai.
33: Jo apni gawahiyon mein raast baazi (upright) par qayam rehte hain.
34: Aur jo apni namaz ki hifazat karte hain
35: Yeh log izzat ke saath jannat ke baaghon mei rahenge.
36: Pas aey Nabi , kya baat hai ke yeh munkirin dayein(left) aur bayein(right) se
37: Giroh (crowds) dar giroh(crowds) tumhari taraf daude chale aa rahe hain?
38: Kya inmein se har ek yeh lalaj rakhta hai ke woh niyamat bhari jannat mein daakhil kardiya jayega?
39: Hargiz nahin humne jis cheez se inko paida kiya hai usey yeh khud jaante hain
40: Pas nahin, main qasam khata hoon mashrikon aur maghribon ke maalik ki hum ispar qadir hain
41: Ke inki jagah insey behtar log le aayein aur koi humse baazi le jaane wala nahin hai
42: Lihaza inhein apni behuda baaton aur apne khel mein pada rehne do yahan tak ke yeh apne us din ko pahunch jayenge jiska insey waada kiya ja raha hai.
43: Jab yeh apni qabron se nikal kar is tarah daude ja rahey hongey jaise apne buthon (idols) ke aasthano (altars) ki taraf daud rahey hon
44: Inki nigahein jhuki hui hongi, zillat inpar chaa rahi hogi, woh din hai jiska insey wada kiya ja raha hai.
